ഉറവകളുടെ ഉറവിടങ്ങള് --- ഒരു ആല്പ്സ് യാത്ര 4
'ആവ്രിയ്' ഗ്രാമം നടന്നു കാണുകയായിരുന്നു. ചെറുതും അതി സുന്ദരവുമായ വീടുകള്. ചെറുതാണെങ്കിലും അകത്തു കയറിയാല് 'അതിവിശാലമായ ഷോറൂമാണ്'. തടികൊണ്ടുള്ള ഒരു മൂന്നു നില വീടാണ് ഞങ്ങള് താമസിക്കുന്ന 'പ്ലാന് സൊലയ്' , ഈ കുഞ്ഞു വീടിന്റെ ഉള്ളില് പത്തു മുപ്പതു ചെറിയ അപ്പാര്ട്ടുമെന്റുകള്! ഓരോ അപ്പാര്ട്ടുമെന്ടിലും അടുക്കള, ഊണുമുറി, കിടപ്പുമുറി, കുട്ടികള്ക്കൊരു ചെറിയ മുറി. വിശാലമായ കുളിമുറി , പിന്നെ മനോഹരമായ ബാല്ക്കണി. സ്ഥലപരിമിതി ഒട്ടും തോന്നാത്ത നിര്മ്മിതി. താഴത്തെ നിലയില്, എല്ലാവര്ക്കും പ്രവേശനമുള്ള വായനമുറി. അതിനു പിന്നില് ഒരു അലക്കുമുറി ,അവിടെ വലിയ വാഷിംഗ് മഷിനും ഡ്രൈയറും വച്ചിരിക്കുന്നു അതിനും പിന്നിലൊരു സോനയും.(മനുഷ്യരെ സമൂലം ഉണക്കിയെടുക്കാന് ).
വീടുകള്ക്കു ചുറ്റും വളരെ കുറച്ചു സ്ഥലമേയുള്ളൂ. അവിടെ പച്ചക്കറി കൃഷി സമൃദ്ധം. മതിലുകളില്ലാത്ത ഗ്രാമം. പൂത്തുലഞ്ഞു കിടക്കുന്ന പ നിനീര്ചെടികളാണ് കാവല്. മത്തനും തക്കാളിയും കാപ്സിക്കവുമൊക്കെ കായ്ച്ചു കിടക്കുന്നു. രാവിലെ വീട്ടുകാരെല്ലാം തോട്ടം പരിപാലനത്തിലാണ്. ചില കൃഷിയിടങ്ങളില് നെറ്റുണ്ട്, കിളികളെ പേടിച്ചാവണം . ആപ്പിള്, പ്ലം ഒക്കെ കായ് നിറഞ്ഞു കുനിയുന്നു. പറമ്പുകള്ക്ക് വേലിയായും ചെറിയ വൃക്ഷങ്ങള് തന്നെ. ഒരിഞ്ചു പോലും മണ്ണ് കാണാനാകാതെ എല്ലായിടത്തും പൂച്ചെടികളും.
വീടിന്റെ തന്നെ ചെറിയ മോഡലുകളാണ് തപാല്പ്പെട്ടികള്. ഇടയ്ക്ക് വേസ്റ്റ് നിക്ഷേപിക്കാനുള്ള തടിപ്പുരകള് കാണണം, നിറയെ പൂച്ചെടികള് കൊണ്ട് അലങ്കരിച്ചു, ഒരു പൂജാമുറിപോലെ. വഴിയോരങ്ങളില്, വഴി വിളക്കിന്റെ ഇടയില്, എന്നു വേണ്ട വഴിയല്ലാത്ത എല്ലായിടങ്ങളും പൂക്കളങ്ങളാണ്. വേരുള്ള പൂക്കളങ്ങള്. സ്വര്ഗ്ഗസൌന്ദര്യം തുളുമ്പുന്ന നാട്ടിന്പുറം.
ഓരോ വീട്ടുകാരും മത്സരിച്ചാണ് തങ്ങളുടെ വീടുകള് സുന്ദരമാക്കുന്നതെന്ന് തോന്നും. വീടുകളുടെ ഫോട്ടോസ് എടുക്കുന്നത് കണ്ടു ഒരു അപ്പുപ്പന് ഇറങ്ങി വന്നു വീടിനൊപ്പം പോസ്സു ചെയ്തു ചിരിച്ചു.
അങ്ങ് ദൂരെ ദൈവത്തിന്റെ സ്വന്തം നാട്ടില് കൃഷി ഒന്നും ചെയ്തിട്ട് കാര്യമില്ലത്രേ , മണ്ണിനാണ് പൊന്നു വില, പൊന്നിന്റെ വില പിടിച്ചാല് കിട്ടില്ല. അതിര്ത്തി കടന്നു, കമ്പത്ത് എത്തിയാല് കൃഷി മോശമല്ലാതെയാകും. കേരള സ്പെഷ്യല് പച്ചക്കറികള് പാണ്ടിലോറി എത്തിക്കുന്നിടത്തോളം കാലം, നമ്മള് എന്തിനു കൃഷി ചെയ്യണം. പാവം മെഡിക്കല് സ്റ്റോറുകള്ക്കു പാര വയ്ക്കാനോ?
എങ്കിലും ജൈവ വിപ്ലവത്തിന്റെ സ്പന്ദനം അങ്ങിങ്ങ് കേള്ക്കുമ്പോള് വെറുതെ പ്രതീക്ഷിക്കും, ഇതുപോലെ സ്വച്ഛസുന്ദരമായ ഗ്രാമങ്ങള് നമുക്കും തിരിച്ചു കിട്ടിയേക്കാം.
ഫ്രാന്സിലെ നാട്ടിന്പുറം നന്മകളാല് സമൃദ്ധം
ReplyDelete