Friday, November 25, 2011

വള്ളക്കടവിലെ അനിയന്,


വിവരങ്ങളൊക്കെ ചേച്ചിയറിയുന്നുണ്ട് . ഇതൊന്നും തമിഴ് നാട്ടുകാരുടെ കുറ്റമല്ല. നമ്മുടെ പിടിപ്പുകേടിന് മറ്റുള്ളവരെ പഴിച്ചിട്ട് കാര്യമില്ലല്ലോ. ഒന്ന് രണ്ടു കൂട്ടുകാര്‍ എന്നോട് ചോദിച്ചു, അവര്‍ക്ക് വെള്ളം കൊടുക്കാതിരിക്കാനുള്ള അടവല്ലേന്ന്. ഒരുവിധത്തില്‍  അവരെ പറഞ്ഞു മനസ്സിലാക്കി. അവര്‍ക്ക് അത്രയൊക്കയേ   അറിയൂ. സിനിമ നിരോധിച്ചത് തന്നെ കണ്ടില്ലേ. ഏതായാലും അവിടുത്തെ ഭരണകൂടത്തില്‍ കാര്യശേഷിയുള്ളവര്‍ ധാരാളമുണ്ട്. അസൂയപ്പെടാനേ നമുക്കു പറ്റൂ.

അണക്കെട്ടിന്‍റെ താഴത്തു തമിഴ്നാടായിരുന്നെങ്കില്‍ ഇങ്ങനൊരു ഗതികേടുണ്ടാവില്ലായിരുന്നു. കേരളം പൊന്നു വിലയ്ക്ക് വെള്ളം വാങ്ങിയ്കുയോ തൊണ്ട വരണ്ടു ചാവുകയോ ചെയ്തേനെ. എങ്കില്‍ പോലും...
കൂടംകുളത്തു കാണുന്നില്ലേ. അവിടെ ഓരോ ജീവനും വിലയുള്ളതു കൊണ്ട് നോക്കീം കണ്ടുമൊക്കയെ ചെയ്യൂ. അത് അങ്ങനെ തന്നെ വേണം താനും.
അടുത്ത ജന്മത്തിലെങ്കിലും എനിക്ക് തമിഴ്നാട്ടില്‍ ജനിക്കണമെന്നാണ് ആഗ്രഹം.

പലരും പറഞ്ഞുണ്ടാക്കുന്നതുപോലെ  അവരത്ര സ്വാര്‍ഥരൊന്നുമല്ല, ജീവിക്കാന്‍ പഠിച്ചവരാണെന്നെയുള്ളൂ. പച്ചക്കറിയില്‍ ദിവസേന കയറ്റി വിടുന്ന വിഷം വാങ്ങി സദ്യയുണ്ടാക്കുന്ന മലയാളികളെപ്പോലെ പ്രബുദ്ധരല്ലെന്ന് മാത്രം. ഹെലികോപ്റ്ററില്‍ ഒരു പാവം ഗ്രാമത്തിന്‍റെ തലയില്‍ വിഷം കോരിയോഴിച്ചത് അന്യനാട്ടുകാരൊന്നുമല്ലല്ലോ. നമ്മടാള്‍ക്കാര്‍ തന്നല്ലെ. പത്തുപുത്തനുണ്ടാക്കാനുള്ള തത്രപ്പാടില്‍ നമ്മള്‍ ചെയ്തു കൂട്ടുന്നതിന്റെ അത്രയും ഒരു തമിഴനും ചെയ്യില്ല. ഇതെഴുതുന്ന സമയത്ത് ചവറയില്‍ വാതകം ചോര്‍ന്നെന്നോ നൂറോളം കുട്ടികള്‍ ആശുപത്രിയില്‍ ആയെന്നോ കേള്‍ക്കുന്നു.

അണക്കെട്ട് തകര്‍ന്നാല്‍ പത്തുമുപ്പത്തഞ്ചു ലക്ഷം പേര് മരിക്കുമത്രേ. അതിന്റെ പകുതി ആള്‍ക്കാര്‍ തുനിഞ്ഞിറങ്ങിയാല്‍ ജലനിരപ്പ്‌ കുറയില്ലേ. കുറയും. പക്ഷെ ഇറങ്ങില്ല. അതുകൊണ്ടാണ് ഇതൊക്കെ അടവാണെന്ന് മറ്റുള്ളോര്‍ വിചാരിക്കുന്നതും.

ഇപ്പൊ തന്നെ, മലയാളം പത്രങ്ങളുടെയും സോഷ്യല്‍ നെറ്റ്വര്‍ക്കുകളുടെയും ആഘോഷം കഴിഞ്ഞു.  ദേശീയ പത്രങ്ങളുടെ മൂലയില്‍ പോലും ഈ വാര്‍ത്ത‍ കണ്ടില്ല. പത്രങ്ങളെ പറയാനും പറ്റില്ല, ആളറിഞ്ഞല്ലേ ഇലയിടൂ. ഇവിടെ ഫ്രഞ്ച് പ്രസിഡന്റിനു പെണ്‍കുഞ്ഞുണ്ടായ വിവരം നാട്ടില്‍ വിളിച്ചപ്പോഴാ ഞാനറിഞ്ഞത്. എന്നാലും വിളമ്പുന്നോര്‍  ഒന്ന് നോക്കണ്ടേ, ഹൈകോര്‍ട്ട് തകരും സ്കൂള്‍ തകരും എന്നൊക്കെ പറഞ്ഞാല്‍ ആരു മൈന്‍ഡ് ചെയ്യും?
ഏതൊക്കെ അമ്പലവും പള്ളിയും മുങ്ങിപ്പോകുമെന്നു ഒരു റിപ്പോര്‍ട്ട്‌ വന്നിരുന്നെങ്കിലോ? . പരിസ്ഥിതിക്കും ആവാസ വ്യവസ്ഥയ്ക്കും  ഉണ്ടാകാന്‍ പോകുന്ന തകര്ച്ചയെക്കുറിച്ചു പറഞ്ഞിരുന്നെങ്കിലോ?  കുറച്ചു പേരെങ്കിലും ഏറ്റെടുത്തേനെ. മനുഷ്യന്‍ മരിയ്ക്കും, മനുഷ്യന്‍ മരിയ്ക്കും എന്ന് വിളിച്ചു കൂവിയിട്ടെന്നാത്തിനാ? കൊക്കെത്ര കുളം കണ്ടതാ?

ദുരന്തങ്ങള്‍ മുന്‍കൂട്ടി അറിയാതിരിയ്ക്കുന്നതാ ഒരു കണക്കില്‍ നല്ലത്. അറിഞ്ഞിട്ടും ഒന്നും ചെയ്യാനൊത്തില്ലല്ലോന്നു വിഷമിക്കെണ്ടല്ലോ. ദിവസേന എത്രയോ കാര്യങ്ങളില്‍ നമ്മള്‍ ഞെട്ടുന്നു, ഖേദം പ്രകടിപ്പിക്കുന്നു. അക്കൂട്ടത്തില്‍ ഇമ്മിണി വലിയ ഒരു ഞെട്ടല്‍ വേണ്ടി വരും, അത്ര തന്നെ.

ഭൂകമ്പമറിയിക്കാന്‍ ഡല്‍ഹിക്ക് എന്തിനാണോ ആളു പോയത്? അറിയിച്ചതോടെ എല്ലാം തികഞ്ഞു. കോടതികാര്യമല്ലേ അവരിടപെടില്ലാന്നും പറഞ്ഞു. വീണ്ടും വണ്ടിക്കൂലി പോയി കിട്ടി. ഈ കാശ് കൂട്ടി വച്ചിരുന്നെങ്കില്‍ ദുരിതാശ്വാസത്തിനുപകരിച്ചേനെ. ഭരണം ആരുടെ കയ്യിലായാലും ഒരുപോലെയാ. വെട്ടിനിരത്തലൊക്കെ എത്ര വേഗത്തിലായിരുന്നു? അന്നും ഇടിഞ്ഞു തൂങ്ങി ഡാമവിടെത്തന്നെ ഉണ്ടാരുന്നു. നശിക്കാനും നശിപ്പിക്കാനും എളുപ്പമാ, ഉണ്ടാക്കാനല്ലേ പാട്. 

ഇനിയിപ്പോ അടുത്ത ഭൂകമ്പം (ദൈവമേ അത് ചെറുതായിരിക്കണേ) വരുന്നത് വരെ, എല്ലാവരും മിണ്ടാതിരിയ്ക്കും. ഇതിനൊരു പരിഹാരം അടുത്ത കാലത്തൊന്നും ഉണ്ടാവില്ല. അത്രേം നാള്‍ പിടിച്ചു നില്‍ക്കാന്‍ അണക്കെട്ടിനു പാങ്ങില്ലെന്ന് നിനക്കും അറിയാം. ഇനി ഉടനെ പുതിയ അണക്കെട്ട് കെട്ടിത്തുടങ്ങീന്നു വച്ചാലും എന്ന് തീരാനാ? തീര്‍ന്നാലും നമ്മളുണ്ടാക്കുന്നതല്ലേ, എങ്ങനെ വിശ്വസിക്കും?

അനിയാ,നിന്നോടെനിക്ക് ഒന്നേ പറയാനുള്ളൂ. പെട്ടകം ഉണ്ടാക്കലും ലൈഫ് ജാക്കറ്റു വാങ്ങി വയ്ക്കലുമൊന്നും നടപ്പുള്ള കാര്യമല്ല. എന്തായാലും  അവനവന്‍റെ കാര്യം അവനവന്‍ തന്നെ നോക്കണം.

കേരളത്തില്‍ സ്ഥലത്തിനൊക്കെ എന്താവില. പത്തു സെന്റ്‌ വിറ്റാല്‍ കമ്പത്ത് ഏക്കറുകള്‍ വാങ്ങാം. കൃഷിയ്ക്കവിടെ നല്ല പ്രോത്സാഹനവും കിട്ടും. നമ്മടെ കൃഷിക്കാരെപ്പോലെ ലോണെടുത്ത് ആത്മഹത്യ ചെയ്യേണ്ടി വരില്ല. അണപൊട്ടി വെള്ളം തീര്‍ന്നാലും വേറെ വെള്ളം സര്‍ക്കാര്‍ തന്നെ എത്തിച്ചോളും. വിറ്റുപെറുക്കി നേരെ മലകയറുക. എന്നിട്ട് തമിഴ് നാട്ടില്‍ ചെന്ന് മാന്യമായി സെറ്റില്‍ ചെയ്യ്. വേരുകളെ കുറിച്ച് ഒന്നും വിഷമിക്കണ്ട. ഒരു മലയ്ക്ക് അപ്പുറവും ഇപ്പുറവും ഒരേ വേരോക്കെ തന്നെ ഓടും. അല്ലെങ്കിലും മണ്ട ചീഞ്ഞതാണെങ്കില്‍ പിന്നെ വേരായിട്ടെന്തിനാ? ഒന്നുമില്ലേലും ജീവഭയമില്ലാതെ പിള്ളേരെ സ്കൂളില്‍ വിടാമല്ലോ. അയല്ക്കാരെയും പറഞ്ഞു മനസ്സിലാക്ക്. 

ഇവിടെ പ്രത്യേകിച്ചു വിശേഷങ്ങള്‍ ഒന്നുമില്ല. ക്രിസ്മസിനുള്ള ഒരുക്കത്തിലാണ് നാട്ടുകാര്‍. എല്ലാവഴിയിലും ദീപാലന്കാരങ്ങള്‍. ഇനി ഒരു രണ്ടു മൂന്നു മാസം ഇങ്ങനെ തന്നെ കാണാം. തണുപ്പ് തുടങ്ങി. പുകവലിക്കാരുടെ പറുദീസയാണ്. തണുപ്പുകാലം കഴിയുന്നതുവരെ ആഗോളതാപനത്തെ കുറിച്ച് ആരും മിണ്ടില്ല. എങ്കിലും  വികസ്വര രാജ്യങ്ങളിലെ പരിസ്ഥിതി ബോധമില്ലാത്ത വികസനത്തില്‍ എല്ലാവരും ആശങ്കാകുലര്‍ തന്നെ.

ഞങ്ങള്‍ ബാന്ഗ്ളൂരിനു  ട്രാന്‍സ്ഫറിനു ശ്രമിയ്ക്കുന്നു. വിചാരിച്ചാല്‍ കൊച്ചിയിലോട്ടും കിട്ടിയേക്കും. വെറുതെ എന്തിനാ..?

(പിന്നെ, നീ തെറ്റിദ്ധരിക്കില്ലെന്നറിയാം, എന്നാലും ഞാനും ഒരു  മലയാളി ആയിപ്പോയത് കൊണ്ടങ്ങു പറയുവാ, റിയല്‍ എസ്റ്റേറ്റ്‌ മാഫിയയുമായി എനിക്ക് ബന്ധമൊന്നുമില്ല. ഈ കത്തിന്‍റെ പേരില്‍  കാശുണ്ടാക്കാന്‍, എന്റെ ബ്ലോഗ് പരസ്യങ്ങള്‍ക്കും കൊടുത്തിട്ടില്ല.)

നിന്‍റെ സുരക്ഷയ്ക്ക് വേറൊരു മാര്‍ഗവും ഞാന്‍ കാണുന്നില്ല. പ്രായോഗികമായി ചിന്തിച്ചു നീ ഒരു തീരുമാനം പെട്ടെന്നെടുക്കും എന്ന് കരുതുന്നു.


സ്നേഹപൂര്‍വ്വം
ചേച്ചി.

6 comments:

  1. കൊല്ലം തോറും ഞങ്ങളുടെ തീരപ്രദേശത്ത് (വൈപ്പിന്‍ ) കടല്‍ ക്ഷോഭം വരും . വില്ലേജ് ആഫീസുകളില്‍ പ്ളാസ്റ്റിക്ക് ചാക്കുകള്‍ കെട്ടുകണക്കിനു സൂക്ഷിച്ചു വച്ചിട്ടുണ്ട്. വെള്ളം കയറുമ്പോള്‍ കടപ്പുറത്തുകാര്‍ വരും . നിര്‍ ലോഭം മണല്‍ ച്ചാക്കുകള്‍ അവര്ക്കു നല്കും . കടപ്പുറത്തെ മണല്‍ നിറച്ച് അട്ടിയാക്കി വച്ച് കടല്‍ ക്ഷോഭം തടായാമല്ലോ...
    അവിടെ കരിങ്കല്‍ ഭിത്തി കെട്ടിയാല്‍ അതു തിരയില്‍ ഒലിച്ചു പോയാലോ എന്ന് ഭയന്നാ പകരം മണല്‍ ച്ചാക്കുകള്‍ നല്കുന്നത്...
    അണപൊട്ടിയൊഴുകി ഇങ്ങു വരട്ടെ...ഞങ്ങള്‍ ആ മണല്‍ ച്ചാക്കുകള്‍ സൂക്ഷിച്ച് വച്ചിട്ടുണ്ട്. അതങ്ങു നിരത്തും ...അല്ല്ലപിന്നെ...!!!

    ReplyDelete
  2. ഹ ഹ നല്ല ഒന്നാന്തരം കത്തും ഗംഭീരമായ അഭിപ്രായവും

    ശ്രീജ ജി ; പറഞ്ഞതില്‍ രസകരമായ പറഞ്ഞതില്‍ കാര്യം പലതുമുണ്ട് ഇനിയും എഴുതുക ആശംസകള്‍

    ഇടക്ക് പുണ്യവാളനെ ഓര്‍ത്താല്‍ പുണ്യവാളനും ഇടക്ക് വരാം കേട്ടോ

    ReplyDelete
  3. കേരളത്തില്‍ സ്ഥലത്തിനൊക്കെ എന്താവില. പത്തു സെന്റ്‌ വിറ്റാല്‍ കമ്പത്ത് ഏക്കറുകള്‍ വാങ്ങാം. കൃഷിയ്ക്കവിടെ നല്ല പ്രോത്സാഹനവും കിട്ടും. നമ്മടെ കൃഷിക്കാരെപ്പോലെ ലോണെടുത്ത് ആത്മഹത്യ ചെയ്യേണ്ടി വരില്ല. അണപൊട്ടി വെള്ളം തീര്‍ന്നാലും വേറെ വെള്ളം സര്‍ക്കാര്‍ തന്നെ എത്തിച്ചോളും. വിറ്റുപെറുക്കി നേരെ മലകയറുക. എന്നിട്ട് തമിഴ് നാട്ടില്‍ ചെന്ന് മാന്യമായി സെറ്റില്‍ ചെയ്യ്. വേരുകളെ കുറിച്ച് ഒന്നും വിഷമിക്കണ്ട. ഒരു മലയ്ക്ക് അപ്പുറവും ഇപ്പുറവും ഒരേ വേരോക്കെ തന്നെ ഓടും. അല്ലെങ്കിലും മണ്ട ചീഞ്ഞതാണെങ്കില്‍ പിന്നെ വേരായിട്ടെന്തിനാ?

    ഒരുകണക്കിന് ഇതാണ് നല്ലത്...

    പിറവം തിരഞ്ഞെടുപ്പ് കഴിയുന്നതോടെ... രാഷ്ട്രീയക്കാരെല്ലാം മൌന വ്രതം തുടങ്ങും!!

    ReplyDelete
  4. പ്രിയപ്പെട്ട ശ്രീജ,
    നവവത്സരാശംസകള്‍!
    സമകാലീന പ്രശ്നത്തെകുറിച്ച്, രോഷവും അമര്‍ഷവും നര്‍മവും കലര്‍ത്തിയെഴുതിയ ഈ പോസ്റ്റ്‌ വളരെ ഇഷ്ടമായി! അഭിനന്ദനങ്ങള്‍ !
    സസ്നേഹം,
    അനു

    ReplyDelete
  5. നന്ദി അനു, കുട്ടപ്പന്‍സ്, പുണ്യാളനും പിന്നെ ഷാജി മാഷിനും.
    വായിക്കുന്നതില്‍ സന്തോഷം

    ReplyDelete
  6. ആ ബഹളമെല്ലാം ഒതുങ്ങി. ചപ്പാത്തിലെ സമരപ്പന്തലില്‍ നാലഞ്ചുപേര്‍ മുമ്പത്തെപ്പോലെ തന്നെ സമരവുമായി ഇരിപ്പുണ്ട്. അത്രയേയുള്ളു.

    ReplyDelete