നോര്മാന്ഡി തീരങ്ങളില്---1
'എത്രിത്താ'യിലേക്ക്. . ഫ്രാന്സിലെ ചരിത്ര പ്രസിദ്ധ കടല്ത്തീരമായ 'നോര്മാന്ഡി'യിലേക്ക് ഒരു ദ്വിദിന യാത്ര. നഗരത്തിന്റെ വിരസതയില് നിന്നും ഒന്ന് മുങ്ങാംകുഴിയിടുന്ന ഉത്സാഹത്തിലായിരുന്നു ഞങ്ങള്. 'പാരിസ്-സൈന്റ്-ലസാ (Paris-St.Lazare)' റെയില്വേ സ്റ്റേഷനില് എത്തി ടിക്കറ്റ് പ്രിന്റ് എടുത്തു. വളരെ തിരക്കുള്ള സ്ഥലമാണ്. ഹൃസ്വ/ദീര്ഘ-ദൂര ട്രെയിനുകള് വരുന്ന ഒരു വലിയ സ്റ്റേഷന്. 'നോര്മാന്ഡി'യിലെക്കുള്ള ട്രെയിന് ഞങ്ങളെ കാത്തു കിടപ്പുണ്ട്. ട്രെയിനില് കയറി ഒരു നാല്വര് സീറ്റില് ഇരുന്നു. ആള്ക്കാര് അധികമില്ല. ട്രെയിന് പുറപ്പെട്ടു 10-മിനിറ്റ് ആയതേയുള്ളൂ, പച്ച വിരിച്ച പാടശേഖരങ്ങള് കണ്ടു തുടങ്ങി. ഇത്തിരി നല്ല കാറ്റിനായി ജനല് നീക്കി നോക്കാം എന്ന് കരുതിയാല് തെറ്റി. പുറത്തു നല്ല തണുപ്പ് തന്നെയാണിപ്പോഴും. വസന്തം പടിവാതിലിന് പിന്നില് നാണിച്ചു നില്ക്കുന്നു. ഇവിടെയെല്ലാം വര്ഷത്തില് രണ്ടോ മൂന്നോ മാസം മാത്രമേ തുറന്നിട്ട ജാലകങ്ങള് കാണാന് കിട്ടൂ. ആഗോള താപനം നിലമെച്ചപ്പെടുത്തുമോയെന്നറിയില്ല. ഏതോ പച്ചക്കറിത്തോട്ടങ്ങളുടെ നടുവിലൂടെ ട്രെയിന് പൊയ്ക്കൊണ്ടിരുന്നു. ലെറ്...